Biografi

         Titiang mawasta I ketut Yasa titiang embas ring Karangasem, Banjar Gunaksa  duk rahina Radite Paing, Wuku Pahang, tanggal 04 Desember warsa 1994. Titiang ngeranjing ring Universitas Pendidikan Ganesha Singaraja saking warsa 2013. Titiang ngarereh Jurusan Pendidikan Bahasa Bali, sane mangkin titiang wau semester III. Sampun awarsa titiang sareng ring UKM Kesenian Daerah, sane mangkin warsa 2014 titiang kasudi dados Koordinator Sub Sie Pesantian UKM Kesenian Daerah, titiang kawantu antuk  sekretaris sub sie pesantian sane mawasta Ni Made Utari Rahayu, saking Jurusan Pendidikan Bahasa Bali, semester III, ritatkala ngamargiang program kerja. Pesantian manut kadi titiang kawagedan risajeroning Dharma Gita satmaka jalaran ngalestariang kahanan budaya Bali sane ngancan sue ngancan ngareredang pamilet nyane lan madue kawigunan ritatkala ngemargiang tatembangane punika, sekadi polih sinar saking Ida Sang Hyang parama Kawi, titiang madue manah mangda pesantian punika prasida ngalimbak pamiletnyane, sakewanten mahasisia tan pati rungu ring kawentenan puniki.

            Rinapkalaning nuju rahanina sekadi, Purnama, Tilem, Saraswati, Pagerwesi miwah sane siosan pesantian puniki ngaturang ayah madana suara ring Parahyangan Kampus Tengah Undiksha, anggota pesantian makesami wenten 7 diri, sekadi Yoga Prasada, Putu Suandika, Ni Made Sri Govika Dewi, Luh Budiasih,  I Wayan Yogi Astawa, I Made Ari  Purwadi miwah  Aristana Diputra. Pesantian puniki sampun wenten saking dumun satmaka gending tradisional sane prasida nudut kahyun sang sane nembangan lan prasida ngareresin hati sang miarsayang, ngiring sareng – sareng ngalestaring budaya baline mangda kantun kaloktah, kasub rahning seni nyane

            Kaunikan pesantian tan sios prasida ngarya garjita ring manah yening selehin, prasida madana punia suara, prasida ngawetuang manah ening, madue widya pangeweruhan ring dharma gita miwah prasida uning ring parikrama kuna carita, wiracarita  sane kawacen.

            Ritatkala nyabran awarsa kamargiag raris Dies Natalis Satmaka wanti warsa Undiksha, angga UKM Kesenian Daerah akeh nyarengin pacentokan Utsawa Dharma Gita Undiksha warsa 2013, mabukti akeh angga UKM Kesenian Daerah polih jayanti ring acara punika, punika cihna pesantian kantun madue genah jagi prasida kalimbakang malih kahuripan seni Dharma Gita. Ritatkala acara wisuda semeton angga UKM Kesenian Daerah sie Pesantian nyarengin ring gerong miwah dalang sane awarsa mangkin kamargiang ping tiga.

            UKM Kesenian Daerah taler ngawentenang pacentokan  Dharma Gita nyabran awarsa, punika matetujon mangda kahanan pesantian kantun prasida ajeg kantos kapungkur wekasan.  Dumadak- dumadik UKM Kesenian Daerah prasida malih ngelanturang pemargi ngalestaring bulaya baline, nitenin kesenian bali sane ngancan sue ngancan ngareredang pamilet nyane.

            Wantah asapunika sane prasida aturang titiang, ngeninin indik kawentenan sub sie pesantian UKM Kesenian Daerah, yening wenten basa basitan titiang sane nenten manut titiang nunas geng sinampura, mapan padewekan titiang sane kalintang tambet, ngiring sareng- sareng  ring UKM Kesenian Daerah ngayah  mangda prasida paras-paros, sarpanaya ring pasemotan antuk dharma gita , puputang titiang antuk ngaturang parama shanti “ Om Shanti, Shanti, Shanti Om”