Satua
Bawak
PAMARGI
AYU
Olih;
I Ketut Yasa
Kacrita ring Desa Ababi, wenten anak
luh jegeg sane mawasta Luh Sinta . Ipun
wau mayusa nembelas tiban, ia mara kelas satu SMA(Sekolah Menengan Atas). Ia
nongos di Desa Ababi ngajak meme bapane, ulian jegegne ia dadi kembang desa di
Desa Ababi. Mekejang anak muani nguberin ngalih ia lakar anggona tunangan,ada
ane sugih, ada ane lacur tur ada masih golongan kasta tegehan. Nanging ia tuah
metilesang raga sawireh ia nawang dewekne lacur tusing ngelah apa-apa,sabilang peteng meme bapane setata mituturin Luh Sinta,
orahine selegang melajah lan melahang masih ngaba raga. Krana meme lan bapane
nawang pianakne dadi uber-uberan truna-truna di desane. Sabilang wai gae meme
lan bapane tuah ke carike memula jukut-jukutan lakar adepa ka peken. Gegaene
Luh Sinta tuah nulugin memene medagang lan melajah. Kacrita Luh Sinta nulungin
medagang ke peken, ditu lantas ia kacunduk ngajak anak truna bagus sane mawasta
Endy,ia anak sugih di Desane. Ngangsan mekelo ngangsan akrab ia ajaka dadua. Sabilang Luh Sinta nulungin
medagang ka peken ia ajaka dadua setata matemu.
Ulian bes pepes ketemu truna bagus
puniki ada keneh ngajak Luh Sinta,nanging
ipun durung purun ngorahang isin
kenehne ngajak Luh Sinta, sawireh ia
nawang ia ajaka dadua kari pada-pada masekolah. Sabilang wai ia setata
ngengkebang isin kenehne,apa buin ia dereng nawang napi ke Luh Sinta wenten keneh masih ngajak ia. Apang tusing rasa
sayang ne endy puniki megantung tanpa cantel,apa buin ia lek yening tresnane
nenten kewales ngajak Luh Sinta. Punika mawinan ia takut ngorahang isin
kenehne, Luh Sinta puniki anak lacur tuah ngandelang medagang ka peken apang
maan baas jakan sabilang wai. Sedek dina anu, sawireh memene gelem ia tusing
ngidaang medagang ka peken. Punika mawinan ia tusing ngelah baas lakar jakane,ditu
lantas Luh Sinta mekeneh lakar nyilih pipis ngajak pisagane lakar anggona meli baas, lantas ia mejalan ka umah
pisagane lakar nyilih pipis, neked ditu, ia meorahan kemu lakar nyilih pipis,lantas
pisagane banggras mesaut sahasa matbat Luh Sinta ngorahang ia anak lacur demen
nyilih pipis, nyelek-nyelekang kulawargane Luh Sinta ane tiwas. Luh Sinta
ngeling sig-sigan, neked di jumahne ia mesadu ngajak meme lan bapane. Meme lan
bapane tuah bisa pasrah lan setata ngastiti bakti ring Ida Sang Hyang widhi
apang icenine karahayuan lan karahajengan.
Gelisin carita sane mangkin Luh Sinta
sampun kelas tiga SMA. Ulian ngangsoang memene ngasukang ia ulian mautang.
Ulian jengahne ia mekeneh lakar ngalih gae di kota yening suba tamat masekolah.
Ia madue cita-cita lakar ngaenang reramane bagia. Ia suba jengah ngajak
timpal-timpal ne sawireh bes sesai ia kajululukang anak tiwas,sabilang wai ia
jemet pesan melajah. Yadiastun ia liu anak nguberin nanging ia bisa ngaba raga
tur matilesang raga tusing ngelah. Ane jani suba ia sayan jemet malajah sawireh
ujian nasional sube paak. Ia ngastiti bakti mangda lulus ujian lan
enggal-enggal ngalih gae makuli. Yadiastun ia ngelah cita-cita lakar ke
perguruan tinggi, nangging ia tusing ja sebet, ia mekeneh yening ia suba ngelah
pipis, buin pidan ia lakar ngalanjutang malih masekolah. Krana ia makeneh
melajah tusing je nawang umur. Keto nyen
Luh Sinta bakti pisan tekening reramanyane.
Gelisin carita mangkin Luh Sinta sampun tamat masekolah. Ia lakar ngalih
gae ring kota. Lantas ia mapamit teken meme lan bapane lakar mejalan ka kota.
Ditu lantas memene mituturin “nah-nah Luh Sinta jani cening suba tamat, cening
mekeneh lakar ngalih gae ka kota, melah-melahang nyen cening ngaba raga,ditu
raga konden taen ngrasanin kenken ditu”. Masaut lantas Luh Sinta “ nggih-nggih
me”. Lantas mejalan Luh Sinta ka kota. Neked ditu ia paling ngalih tongos
megae, ditu lantas ia kacunduk ngajak anak muani kota sane mawasta Vino. Vino
puniki artis terkenal saking kota. Ia lantas makenalan ngajak Luh Sinta bajang
desa, ditu lantas Luh Sinta magendu wirasa ngajang Vino. Lantas Vino puniki
ngajak Luh Sinta ke genah tongosne magae.
Luh Sinta tengkejut krana ia ajaka ke tongos ne Vino syutting film. Mara jani
ia nyingakin langsung ken-ken anake main film. Ditu Luh Sinta bengong mebalih,
saget teka sutradara nyagjagin lan metakon asal-usul Luh Sinta. Ulian
kejegegane Luh Sinta, lantas ia ajakine main film. Luh Sinta lantas nyak main
film ngajak timpal ne mara kenal inggih punika Vino. Luh Sinta nenten ja taen
ngeluh, ia setata liang nyalanin gaene punika.
Kacrita mangkin Luh Sinta sampun dados
artis terkenal, mekejang pisagane ngon lan ada mase ane iri ngajak ia. Sampun mekelo
Luh Sinta nenten taen mulih ke desane sawireh iya sibuk pesan. Yadiastun ia
nenten taen mulih nanging ia setata inget ngajak reramane di jumah.ia setata
ngirim pipis banga meme lan bapane anggona meli baas. Jani meme lan bapane
idupne sampun nenten meweh. Meme lan bapane tuah ngon nyingakin pianakne sampun
sukses ulian merantau. Meme lan bapane kangen pesan ngajak ia, sawireh suba
makelo ia tusing taen matemu ngajak pianakne.meme lan bapane setata ngastiti
bakti mangda pianakne setata seger di kota lan setata ngamolihang karahayuan.
Gelisin carita sampun atiban Luh Sinta
magae ring kota. Jani ia lakar mulih ka desane ngajak timpal-timpal artisne.
Neked ring desane ia kasambut olih meme lan bapane, meme lan bapane seneng
pisan pianakne sampun ring desa. Luh Sinta ngeling sig-sigan nyaritayang
undukne buka jani,ia nenten ja sombong, pisagane ngon lan mekejang melali ka
umahne Luh Sinta. Ditu lantas ia macerita,timpal-timpal artisne ngon nepukin
Luh Sinta. Mekejang timpal-timpalne ngibur masyarakat di desane. Makejang pada
seneng,sedek Luh Sinta maliang-liangan saget teka truna bagus masa lalune sane
mawasta Endy. Luh Sinta tengkejut nyingakin Endy. Lantas endy nyapatin sahasa
nakonang kabar, manah Luh Sinta tusing cara biasane, ipun minab lek matemu
ngajak endy, napike Luh Sinta sampun madue keneh sareng Endy? Endy masih
bengong ngon nepukin Luh Sinta, tresna kapertama nyane. Ia ajaka dadua bengong.
Sawireh Endy kaliwat demen ngajak Luh Sinta, Endy mongahang raga ngorahang isin
kenehne uli pidan. Luh Sinta tengkejut, nanging
ia masih tusing ngidaang ngengkebang isin kenehne ia masih demen ngajak
Endy. Endy lega pisan sawireh tresnane kawales olih tresna. Mangkin ia ajaka
dadua sampun mademenan. Ia percaya yening jodoh tusing ja lakar kija.
Kacrita mangkin Luh Sinta malih ke kota
wenten kontrak film, nanging nenten ja sue wantah kalih sasih. Endy tunangane
sedih pisan nanging ia tetep ngicenin Luh Sinta ka kota ngalih gae lan pangupa
jiwa. Ia percaya Luh Sinta nenten ja ngae Endy sebet. Kacrita sampun kalih
sasih Luh Sinta mekarya. Mangkin ia jagi ka desa,ia ngaba gagapan magenep
baanga reramane, tunangane lan pisagane ane paak. Tunangane lega pesan,mangkin
Luh Sinta sampun sugih ulian ngalih gae merantau, nanging ia nenten ja angkuh.
Ia setata metilesang raga,nggih puniki pikolih anake jemet, matilesang raga lan
setata ngrastiti bakti. Anak sane prasida asapuniki akehan sane nemu bagia.
Krana yening iraga kantun maurip ring jagate sampunang ja sombong, krana Roda
kahidupan setata maputer, kadang iraga wenten ring duur, kadang masih iraga
wenten ring beten,mangda prasida dados anak sane madue parilaksana sane patut,
nganutin titah Sang Hyang Parama Kawi.
KAKARYANIN
ANTUK: I Ketut Yasa.
Pendidikan Bahasa Bali Undiksha
0 komentar:
Posting Komentar